.

Fontana di Largo Li Volsi (Castelbuono)

A funtanedda di Denzina Genchi

…Eri na funtanedda chianciulina
e pi tant’anni
inchisti bummareddi e lancidduzzi
e t’assuppasti chiacchiari e discursi
di fimmini mriusi e parrasciani
ca vannu all’acqua sulu pi sparrari
di la cummari di la so’ cummari
di la cugnata di la so’ vicina
e di la soru di l’anticu amuri.
… Viristi la stanchizza di li mula
e lu suduri di li zappatura
e tanti voti ccu lu to’ frusciuni
vagnasti li carusi sfaccinnati
sutta lu suli moddu di la stati.
… Eri na funtanedda chianciulina.
La vucca? Na risata e un sigghiuzzu
li spaddi chini di vacantaria
li pedi sempre ammoddu all’ammargiatu.
… Eri na gran signura e na criata
pronta a livari siti e a puliziari
agnuni di suttani e cammareddi
staddi fumanti e gavuti annateddi
mani a li morti e facci ’e picciriddi
falari di mammani e panni vecchi
mmiscati ccu li fasci e li bustiddi.
… Pi ccu sapia ascutari tu cantavi
storii di muntagni e di burruna,
di filici, di lippu e di liani
di truvatura d’oru e picurari
ca dorminu abbrazzati all’agnidduzzi
dintra a na grutta o dintra a li pagghiari.
… Ci penzu … sai?
di la tò vuci longa e lu to’ “picchiu”
di la malincunia di lu to’ chiantu.
… Ci penzu … sai?
ca eri duci duci
lu scruscio ca facia a lancedda
quannu l’acqua arrivava nna lu coddu …
… clo clo
… clo clo
accura ca ti vagni li scarpuzzi …
accura ca ti vagni ’a visticedda.

.

da:"La croce sul pane" di Franco Lupo pagg.39/40 - Edidioni del Periodico Le Madonie